Programm Ladin

1) N economia sterscia per na provinzia sterscia

L suzes tl ciamp di mprenditëures crieia bensté y se manifetea tres l’avëi, la furmazion, la nfrastrutures, la cultura y la valivanza soziela. Purmpò muessa l’economia vester al servij dla persona, y nia l cuntrèr. Nëus se tulon dant de arjonjer n economia sustenibla da n pont de ududa ambientel y soziel, che sibe inovativa te duc i setëures y sustenion cërtli cumerziei regiunei. Dantaldut chëi mpresars che sustën l teritore local se merita de unì susteniì cun pruvedimënc, a na maniera che i vënie renfurzei. Nëus se tulon nce dant de smendrì la burocrazia y son per n sistem de tré ite la chëutes locales te na maniera plu iusta.

2) Sanità per duc

Duc i zitadins, unfat da tant che i davania, à l dërt a na assistënza sanitera de auta cualità, ajache chësta ie na arjonta da nia plu renunzië per na sozietà zivila. Nce sce l ie unì nvestì dassënn tla sanità provinziela, ie truep deventà piec: messëi aspité massa giut pra la vijites spezialistiches, la mancianza de personal de dutores y nfermieres ti spediei, i problemes pra l prim aiut a Bulsan, la tardivanza de n sistem informatich per la sanità, mé per n cumpedé su n valguni. Nëus on svilupà n valguna soluzions, ma danora val debujën de trasparënza y meritocrazia tl Azienda sanitera che da massa truep tëmp ie deventeda mé plu na cianel ulache i partic possa jì a maië.

3) Anjeniei per l 21. esm secul

L’istruzion ie la fundamënta per la nosta sozietà. Nvestì tla istruzion, formazion, cultura y nrescida, uel dì nvestì per l daunì, te na sozietà cun zitadins segures de se ntësc, politicamënter respunsabli, plurilinguai, profescionalmënter cumpetitives y donca al autëza de se realisé. L sel dla democrazia ie la cultura y chësta va sustenida te si formes de esprescions plu desferëntes zënza che a priori vënieles strëntes ite da vel’parauedli. Per vester anjeniei tl 21 esm secul val debujën dla digitalisazion coche porta d’entreda per l daunì dla mprejes, di zitadins y dla publica aministrazion.

4) Libertà y segurëza

Nëus son per na sozietà davierta, pra chëla che uni persona possa viver cun liedëza y do si ulentà. Südtirol ie na provinzia do la rata segura, purmpò ulons ste cun i uedli davierc y cumbater uni forma de criminalità. L ie l duvier dla politica de ti ste daujin a chëi zitadins che à la perzezion de ne se sentì nia segures, ajache chësta melsegurëza nfluenzea si libertà. I fac de cronica negativa ne dëssa nia unìi sfrutei melamënter per ti fé tëmes ala jënt y depona les sfruté coche tatiches liteles. Plutosc val debujën de mëter la forzes dl ordenn te cundizions de lauré te na maniera sarëina y nvestì tla prevenzion.

5) Degun vën lascià da na pert

Südtirol ie te na region rica, purmpò iel for plu y plu persones cun si families che ie stlutes ora da chësta richëza y se stënta a ruvé ala fin dl mëns cun cie che i à. I cosć dla vita y per l albierch ie per trueps massa auc. Per na majera iustizia soziela muessa la provinzia bater sun l pel dla chëutes fajan a na maniera che l vënie a s’l dé de n aumënt dla tarifes pra la minimes di paiamënc y miran a na politica soziela tlera. Mé nsci arjonjun retribuzions cun denità. L medemo vel per la pensions: n adrova pruvedimënc politics mirei , ajache truepa jënt de tëmp se limitea a sëuraviver y ie sun l lim dl’ejistënza minima.

6) De manco imigrazion ma perchël na mieura integrazion

Ai fenomens di muciadives ti muessen jì permez cun umanità, ma i muessa nce vester sustenibli per l teritore . L va debujën de desferenzië danter muciadives de viera, migranc economics o d’autra formes de muciadives y chiche ne respetea nia la regules dëssa lascé nosc raions. L problem possa mé unì ressolt a livel europeich, ma nce Südtitol muessa fé si pert: ai muciadives recunesciui muessen ti dé l azes al marcià dl lëur, ala furmazion profesciunela y ai studi di lingac. Oradechël muessa nosta provinzia deventé atrativa per i bon cëves.

7) Vaghé plu autonomia

Nosta autonomia ie na arjonta ezeziunela y vën studieda a livel internaziunel. L ie n strumënt iuridich che ie stat bon de mëter aduna nosta realteies storiches tan tramentedes les purtan sibes a n svilup economich che a n bënvester tla sozietà. Per l daunì ie la streda dessenieda: ulon n Südtirol cun mo deplù cumpetënzes y autonomia. Ulon arjonjer n model de svilup cun na Talia for manco zentralista y son per n daunì de n Europa dla Regions. Nëus se on fat pensieres y on laurà ora prupostes coche l statut de autonomia possa unì refurmà a na maniera che l sibe adatà ala ndesfidedes dl daunì.

8) Fé pea per tò deberieda la dezijions

L istituzions democratiches à n rodul da nia renunzië, purmpò iel fundamentel che la zitadines y i zitadins posse to pert ala dezijions che les/i reverda. I strumënc de democrazia direta preudui ncueicundì possa unì miurei y muessa giaté na si lerch nce tl contest dla riforma dl satut de Autonomia. Plu n generel iel da nunzië che l architetura de nosta democrazia messëssa unida mudeda, per ejëmpl tres na reforma de lege litela, ne lascian nia pro de abiné adum plu ncëries, de udëi danora n lim ai mandac politics y lauran sun la previjion de criters plu strënc per schivé cunflic de nteres.

9) Dezijions da snait per la mubilità

Nvestì ti ntervënc che vede per l bën de na mubilità sustenibla, uel di crië la cundizions per miuré la cualità de vita de duc y de scuné l ambient y la sanità. La va debujën de n saut culturel da snait: sibes tl trasport dla marcianzia che nce dla persones muessen passé da na vijion “autocentrica” a na strategia intermudela. L passaje dal trafich individuel dl auto ai mesums de trasporc publics, muessa vester na atrazion per i penduleres, y chësc anjenian ferates a tram. L traffich dla marcianzies muessa passé dal trasport sun gumi a chël sun scines y l va debujën de n trasport publich local sterch y de cualità.

10) Sun la streda de na region model: ambient, agricoltura y energia

Per n svilup sustenibl val debujën de na interazion danter economia, ecologia y sozietà. Te Südtirol iel da giaté duta la cundizion ideeles per crië na region ecologica de model. La sensibiltà dla populazion n con’ de chësc argumënt ie dldut davierta tla cusapevulëza che n ambient sann ie dezisif per na cualità de vita auta. La scunanza dl paesaje, dla biodiversità y dla sanità muessa verster a uni maniera la prezedënza sun l profit economich. Ti ulon lascé a nosc mutons y nepoc na provinzia sana y ntonn.

11) La cultura coche fundamënta de nosta comunità

I jëuni adrova la sensazion de segurëza per crì ora sarëins ciuna furmazion o ciun studi a chëi che i uel ti jì do, y mplu, ëi uel nce se sentì segures canche la se trata de mëter su na familia. L pont zentrel ie zënzauter che uni persona possa se lascé jì y sfruté si potenzial y chësc se manifestea nce tl raport costrutif de cunvivënza danter i grups linguistics. Furmazion y svilup tl mond dl lëur possa mé avëi suzes tl cërtl dl plurilinguism. N travert mpurtant ie daviadechël se nuzé dla ufiertes de nosta cultura, carateriseda da aspec tan deferënc. L va debujën de crië na rë danter la ufiertes cultureles sul teritore. L ie la cultura che crieia i sëns dla purtenienza y dla comunità.